MAVUGO KUKINUKISHA LEO DHIDI YA NDANDA

Na Tausi Salum

WAKATI Kikosi cha Simba, kikishuka dimbani leo kwa ajili ya kuanza msimu mpya wa Ligi Kuu Tanzania Bara, kamati ya usajili ya klabu hiyo imefanikiwa kupata hati ya uhamisho ya Kimataifa (ITC) ya mshambuliaji Laudit Mavugo.

Mchezaji huyo leo anaweza kuwa miongoni mwa wachezaji wa kikosi cha kwanza kwa Simba, endapo kocha wa klabu hiyo ataamua kumchezesha.

Hati hiyo imepatikana baada ya Katibu mkuu wa Simba Patrick Kahemele kwenda kumalizana na viongozi wa klabu yake ya Vital'O ambayo alikuwa aikiichezea nchini Burundi.

Awali Vital'O walilipeleka jina la mshambuliaji huyo katika Shirikisho la mpira la Burundi kuonesha kuwa walikuwa na mkataba nae na alikuwa katika kikosi kwa ajili ya msimu mpya wa ligi nchini humo.

Katibu mkuu wa Simba  Alisema kuwa kuwa tayari ITC za wachezaji wote waliowasajili msimu huu zimefika akiwemo ya Mavugo na washazipeleka Shirikisho la mpira wa miguu Tanzania TFF.

"ITC za wachezaji wote wakigeni tuliowasajili tumezipata na tushazipeleka TFF tayari kuanza kuitumikia Simba" alisema Kahemele.

Mavugo anategemewa kuwepo katika kikosi cha Simba kitakachoshuka dimbani kesho kuwakabili Ndanda FC katika mechi ya ufunguzi wa ligi kuu ya Vodacom itayochezwa kwenye uwanja wa Taifa jijini Dar es Salaam.